ՄԻ ՔԻՉ ԵՐԱԶԵՆՔ (IMAGINE)

Է~հ… Այսօր  էլ  եկեք  երևակայենք  մի  փոքր: Մեկ-մեկ  կարող  ենք  մեզ  թույլ  տալ: Ոչ  թե  մեկ-մեկ, այլ  ամեն  վայրկյան: Այո՛, այսօր  հենց  այդ  օրն  է  երևակայելու  ու  երազելու: Չէ՞  որ  իրականությունը  շատ  բան  է  թողնում  երևակայելու  համար: Պատկերացնենք, որ  մեզնից  ներքև  դժոխք  չկա… միայն  կապույտ  երկինք: Դե, եթե  այսօր  երազելու  ենք, ուրեմն  ոչնչից  մեզ  չզրկենք: Իսկ  երազել  կարող  են  բոլորը  ու  երազել  այն  բաների  մասին, որոնց  մասին  անթույլատրելի  է  մտածել:                                                                                                     
Միշտ  այն  կարծիքին  եմ  եղել, որ  պետք  է  վախենալ  ոչ  թե  երազանքներից, այլ  երազողներից: Հըմմմ, ուրեմն  մեզնից  շատերը  այսօր  կվախենան: J  Երազանքը  հիանալի  բան  է, միայն  թե  պետք  չէ  մոռանալ, որ  այն  երազանք  է: Մարդիկ  ասում  են, որ  երազանքով  ոչինչ  չի  կերակրվում, ոչ  ոք  չի  կշտանում: Բայց  մի  րոպե… Բա  հոգի՞ն, կյա՞նքը: Միևնույն  է  մարդն  առանց  երազանքի  նման  է  անթև  թռչունի:                                             Երազանքը  երեխայի  նման  է. ինչպիսին  ծնողն  է, այնպիսին  էլ  այն  կլինի: Դե  ուրեմն  եկե՛ք  այնպես  երազենք, որ  այն  լինի  խելոք, գունավոր  ու  մեզ  լսող: Որ  մեր  մասին  կարծիք  կազմեն  ոչ  թե  մեր  մտքերով, այլ  երազանքներով: Բայց  չմոռանա՛ք  ձեր  երազանքին  հետ  բերել  տուն… այլապես  դուք  էլ  թռչելու  ունակությունից  կզրկվեք… J